29 қараша, KAZNEWS. Моңғолиялық жүдошы Ц.Цогтбаатар Әбу-Дабиде өтіп жатқан “Grand Slam” турнирінде жеңімпаз атанды, деп хабарлайды Kaznews.mn тілшісі.

Халықаралық жүдо федерациясының сайтынан алынған мәліметке қарағанда, -73 кг салмақта татамиге шыққан олимпиада ойындарының қола жүлдегері Ц.Цогтбаатар финалда өзбек Х.Тураевтан басым түсті. Турнир барысында Ц.Цогтбаатар татамиге екінші айналымнан шығып, белгиялық қарсыласын жеңді. Ширек финалда словакиялық Мартин Хойякты айқын басымдықпен жеңді.

Жартылай финалда ресейлік Армен Агаянды ұтып, алтын медаль үшін күресуге мүмкіндік алды. Бұл – Ц.Цогтбаатар үшін – “Grand Slam” турниріндегі төртінші алтын медалі.

Сонымен қатар, +100 келі салмақта 22 жасар Одхүү Цэцэнцэнгэл екінші кездесуінде өзбекстандық палуанды, ширек финалда финландиялық қарсыласын ұтты. Жартылай финалда Украиналық В.Евхиннен басым түстіп финалға жолдама алды. Ол финалдық кездесуінде Румыниялық С.Валдуттан айласын асырып, турнир жеңімпазы атанды.

Еске сала кетейік, бұл жарыста Моңғолия құрамасы екі алтын, үш қола жүлде алып отыр.

24 қараша, KAZNEWS. Улаанбаатар қаласында SPS телеарнасының бастамасымен ұйымдастырылған “Бахдам гарамгай уран хурц” палуандар бәсекесінде Баян-Өлгий аймағының тумасы мемлекеттік лашын дәрежелі палуан Серік Бердімұратұлы жеңімпаз атанды.

Серік жеңістің биік тұрғырына көтерілу үшін 7 қарсыласынан басым түскен.

16-17 қараша күндері Моңғолдың ұлттық күресінен жасөспірімдер арасындағы ел біріншілігі Улаанбаатар қаласында өтті.

Жарысқа елдің 21 аймағы мен Улаанбаатар қаласының 9 ауданынан үздік 60 спортшы  қатысты. 

16 жас аралығындағы бәсекеде Сонгинхайрхан ауданының палуаны С.Бат-Эрдэнэ 27 палуанды ұтып чемпион атанса, Баян-Өлгий аймағының спортшысы С.Нұртілек 26 палуанды жеңіп күміс медаль иеленді.

Ал, 17 жас аралығындағы бәсекеде Сэлэнгэ аймағының палуаны Г.Төгсжаргал 28 палуанды ұтып жеңімпаз атанса, Баян-Өлгий аймағының палуаны Иманғали Бақытұлы 27 палуанды тізе бүктіріп күміс медаль иеленді.

Спортшыларға Баян-Өлгий аймағының «Тастүлек» спорт клубының қожайыны С.Бақыт бапкерлік етеді.

22 қараша, KAZNEWS. Халықаралық дәрежелі спорт шебері Сайфолла Тілеубердіұлы ересектер арасындағы -120 келі салмақта классикалық поуэрлифтинг бойынша 835 келі көтеріп, ел чемпионы атанды.

Улаанбаатар қаласында өткен ел чемпионатының -120 келі салмақ дәрежесіне 9 спортшы күш сынасқан.

Сайфолла Тілеубердіұлы поуэрлифтинг бойынша Баян-Өлгий аймағынан шыққан тұңғыш, әрі бүгінгі таңдағы бірден-бір халықаралық спорт шебері. 

Сайфолла Тілеубердіұлы бүгінде бірқатар рекордтық көрсеткіштер иесі атанып отыр. Моңғолияда 16 рет ел чемионы атанған. Атап айтсақ классикалық поуэрлифтингден 6 мәрте ұлттық чемпион атанып, 18 рет рекорд жаңартқан. Ал, экифировка поуэрлифтингден 10 дүркін Моңғолия чемпионы атанған.

Азия чемпионатында үш рет жеңімпаз атанып, 2014 жылы АҚШ-тың Флорида Уест Фалм Вейч қаласында өткен WPF федерациясының әлем чемпионатында рекорд жаңартып жеңімпаз атанған. 2017 жылы Чехияның Пилзен қаласында өткен IPF федерациясының әлем чемпионатында 5-орын иеленген.

Cайфолла өзінің алдағы уақыт еншісіндегі спорттағы жоспарларымен бөлісті:

– Осы жылдың 24 желтоқсанда Ыстамбулда өтетін IJP федерациясының Азия чемпионатына қызу дайындық үстіндемін. Өз басым бұл құрлықтық бәсекеде төртінші рет чемпион атануды мақсат етемін.