26 желтоқсан. KAZNEWS ақпараттық агенттігі жыл сайын «Жылдың үздік 10 оқиғасын» анықтауды дәстүрге айналдырған. Агенттіктің көзқарасы бойынша 2021 жылдың үздік оқиғасы төмендегідей.

1. Моңғолияның “Еңбек ері” атағы Әнуарұлы Нотаға, “Халық дәрігері” атағы Рәмішұлы Асайға берілді

Моңғолия Президенті У.Хүрэлсүхтің жарлығы бойынша Нейрохирургия саласында ми қан тамырлары ауруларының диагностикасын, хирургиясын және емдеуін теориялық тұрғыда дамытып оны тәжірибеге толығымен енгізу мен қатар нәтижелерін әлемдік деңгейге жеткізгені үшін Мемлекеттік сыйлықтың иегері, Еңбек сіңірген дәрігер, доктор профессор, даңқты нейрохирург Ануарұлы Нотаға Моңғолияның “Еңбек ері” атағы, Моңғолияның Ұлттық онкологиялық орталығының кеңесші дәрігері, Еңбек сіңірген дәрігер, доктор профессор Рәмішұлы Асайға «Халық дәрігері» атағы берілді.

Елім дейтін ер болмаса, ерім дейтін ел қайдан болсын! Ерім дейтін ел болмаса, елім дейтін ер қайдан болсын!

Ануарұлы Нота мен Рәмішұлы Асай дәрігердің Президенттен алған атағын KAZNEWS ақпараттық агенттігі жылдың үздік оқиғасы ретінде анықтап отыр.

2. Қазақ қызы алғаш рет әлем чемпионатының қола жүлдегері атанды

Польшаның Кельц қаласында бокстан өткен жастар арасындағы әлем чемпионатында 51 келі салмақ дәрежесінде Құлын Алтынбекқызы қола жүлдегер атанды. Шаршы алаңда украйналық Дарья-Ольга Гутаринаны және Қазақстандық Гүлнар Тұрапбайды жеңіп, жартылай финалға өткен болатын. Ол жартылай финалдық кездесуінде ресейлік Валерина Линоваға есе жіберіп алды.

Құлын Алтынбекқызының Моңғолия қазақ қыздары арасынан алғаш рет әлем чемпионатында қола жүлдегер атануы 2021 жылдың үздік оқиғасы ретінде анықталып отыр. 

3. «Жыл басы – Наурыз 2021» бағдарламасы арқылы қазақтың салт дәстүрі дәріптелді

Нұрбек Жырғауұлы жетекшілік ететін «Өлгий жерлестер дамыту кеңесі» мемлекеттік емес ұйымының қолдауымен, Моңғолия Жастар одағының Улаанбаатар қаласындағы Баян-Өлгий жастар бөлімшесі бірлесіп «Жыл басы Наурыз – 2021» атты бағдарламасы Талын Монгол телеарнасында көрерменге жол тартты.

Бағдарламада қазақ халқының салт дәстүрі дәріптеліп, Моңғол халқына Ұлыстың ұлы күні Наурыз мейрамы туралы кең көлемде ақпарат берілді.

Салтанатты шара барысында Моңғолия эстрадасындағы қазақ халқынан шыққан жұлдыздар әнмен шәшу шашты.

4. Ризабек Жазидолдаұлы Халықаралық ТҰРАН сыйлығының лауреаты атанды

Ризабек Жазидолдаұлы 2021 жылғы Бейнелеу өнері саласы бойынша Халықаралық ТҰРАН сыйлығының лауреаты атанды.
Халықаралық ТҰРАН сыйлығына Моңғолия, Қазақстан, Өзбекстан, Әзербайжан, Молдава, Ресей, Қырғызстан, Түркіменстан қатарлы елдерден суретшілер қатысты.

Ризабек Жазидолдаұлы тақырыптық композицияларын көркемдік рәсіммен жандандырып, романтикалық туындыларында эмоциялық сезімдер бере біледі. Тарихтың бір түйінінен поэтикалық ой толғап, дерегіне үлкен философиялық, символикалық ой жүгіртеді. Образды ойлауда типтік қасиет дарыту шебер.

5. Жаннұр Көпжасарқызы шахматтан халықаралық турнирдің жеңімпазы атанды

Шахматтан Моңғолияның әуесқойлар арасындағы ел біріншілігінің күміс жүлдегері Жаннұр Көпжасарқызы 1959 жылы құрылған француздың әйгілі «Europe Echecs» клубы ұйымдастырған онлайн-халықаралық ашық турнирге сәтті қатысып, 1600 -ге дейінгі деңгейдегі шахматшылар арасында жеңімпаз атанды.

Бұл жетістігі үшін оған Еуропалық шахмат жаттығу алаңын бір жыл бойы тегін пайдалану құқығы берілді.

6. Ел біріншілігінде таеквондошылар 1 күміс, 3 қола медаль жеңіп алды

Улаанбаатарда таеквондодан Моңғолия біріншілігі мәресіне жетті. Ел біріншілігінде Баян-Өлгий аймағының намысын қорғаған спортшылардың жетістіктерін «Арман» таеквонда клубының жетекшісі Ерұлан Шөленұлы қорытындылап берді.

Байрақты бәсекеге 55 командадан 520 спортшы күш сынасты. Жастар арасындағы -55 келі салмақта өнер көрсеткен Айдарханұлы Тасқын қола медаль, ересектер арасындағы сайыста -68 келі салмақта өнер көрсеткен Сейлұлы Ақниет қола жүлдегер атанды.

Қыздар арасындағы -70 келі салмақта өнер көрсеткен Құмырбекқызы Гүлдәурен қола медаль иеленсе, +70 келі салмақта Асылбекқызы Әсемхан 2021 жылғы ел біріншілігінің күміс жүлдегері атанды.

Ел біріншілігіндегі Баян-Өлгий спортшыларының жеңіске деген ұмтылысының жоғары екенін көруге болады. Таеквондашы жастардың өнері жылдың үздік оқиғасына лайық.

7. Моңғолиялық ерлі-зайыпты әншілер «Алтайдың ар жағынан келген ару» әнін орындап хошеметке ие болды

Моңғолиялық ерлі-зайыпты әншілер А.Анхбаяр мен Б.Чанцалдулам ақын сазгер Тынышбайұлы Рахымның «Алтайдың ар жағынан келген ару» әнін орындап, әлеуметтік желіде хит болды. Казньюс ақпараттық агенттігі қос әншімен байланыс орнатып, әңгімеге тартқан еді.

А.Анхбаяр бұл әнді алғаш рет 1993 жылы Увс аймағында әскери міндетін атқарып жүрген кезде Баян-Өлгий аймағынан келген Молдаш, Қуанған, Аманбек есімді қазақ әскерлер аузынан естіп, сөзі мен әнін жаттап алғанын айтады. Содан бері үнемі айтып жүрген. Өнер жолын қуғаннан кейін бұл әнді орындау қажет екен деген ой келген. Қазақ әндерінің әуені керемет болады. Сол үшін де қазақ шығармаларындағы биік құзар шыңдар, әдемі табиғат, қазақ халқының салт-дәстүрлері көрсетілетінін ұнатады.

Ал, оның зайыбы Чансалдуламның айтуынша: «Алғаш танысқан кезде Анхаа маған гитарамен бір ән орындап беретін. Ол әннің сөзін түсінбесем де әуені керемет болатын. Сөйтсем осы ән екен. Махаббат туралы ән әрі музыкасы көңілімнен шыққан соң бұл әнді ұнатып қалдым. Содан дует болып орындайық деп жолдасыма ұсыныс жасадым. Ол да қуана келісті» – дейді.

Әнді жарыққа шығарғалы көп болмаса да, қазақ халқының зор алғысына бөленіп жатырмыз. Бұл бізді ерекше жігерлендірді. Тезірек әдемі киімдер тіккізіп, клип жасап шығаруды ойлап отырмыз. Сіздерге бізді құрметтеп, сұхбат жасау мүмкіндігін беріп отырғандарыңызға алғыс білдіреміз. Оқырмандар мен барша қазақ халқына тек қана әлемдегі бар жақсылықтарды тілейміз!

8. С.Нұртілек пен Б.Иманғали жасөспірім палуандар арасындағы ел біріншілігінен күміс жүлде алды

Моңғолдың ұлттық күресінен жасөспірімдер арасындағы ел біріншілігі Улаанбаатар қаласында өтті. Жарысқа елдің 21 аймағы мен Улаанбаатар қаласының 9 ауданынан үздік 60 спортшы қатысты.

16 жас аралығындағы бәсекеде Сонгинхайрхан ауданының палуаны С.Бат-Эрдэнэ 27 палуанды ұтып чемпион атанса, Баян-Өлгий аймағының спортшысы С.Нұртілек 26 палуанды жеңіп күміс медаль иеленді.

Ал, 17 жас аралығындағы бәсекеде Сэлэнгэ аймағының палуаны Г.Төгсжаргал 28 палуанды ұтып жеңімпаз атанса, Баян-Өлгий аймағының палуаны Иманғали Бақытұлы 27 палуанды тізе бүктіріп күміс медаль иеленді.

9. Математика пәнінен академик Мекей Әбішұлы атындағы батыс зоналық дәстүрлі олимпиадасында аймақтық оқушылар көш бастады

Өлгий қаласында математика пәнінен Моңғол елінің «Халық ұстазы», доктор, профессор, академик Мекей Әбішұлы атындағы 7-ші батыс зоналық олимпиада өтті. Математика пәні бойынша өтіп жатқан сайысқа аймағымыздан және көршілес Увс, Ховд, Баянхонгор аймағынан командалар келіп қатысты.

Батыс зоналық олимпиадаға 20 команда 300 оқушы, 40 ұстаз бақтарын сынап, қорытынды есеппен Баян-Өлгий аймағының 1-ші командасы бірінші орын, Увс аймағының 1-ші командасы екінші орын, Баянхонгор аймағы мен Увс аймағының 2-ші командасы үшінші орын иеленді.

10. Жылдың үздік 3 бейнебаяны анықталды

Баян-Өлгий аймағы эстрадасының танымал жұлдыздары НҰР тобы (Кертай Зархумұлы, Сәтжан Класханұлы) мен Заманбек Абдуллинұлы бірлесіп ақын Мейраш Қибатайұлының сөзіне жазылған “Әдемі қыз” әніне, Нұр тобы «Баян-Өлгий мекенім» әніне, Моңғолияның ең танымал әншісі С.Жавхлан «Өлгий жерлестер дамыту кеңесі» -нің директоры Нұрбек Жырғауұлының қолдауымен “Өнөд орших Өлгий” әніне жаңа бейнебаян түсірді. Бұл бейнебаяндар әлеуметтік желіде үлкен қолдауға ие болуы Казньюс ақпарат агенттігінің 2021 жылғы үздік оқиғалар тізбегіне қосылып отыр.

Жаңа жылда жағымды жаңалықтарымыз көп болсын ағайын! 

KAZNEWS AGENCY