Әбу Насыр Әл-Фараби — түркі ойшылдарының ең атақтысы, Аристотельден кейінгі ұстаз атанған ғұлама. Экономикасы мен мәдениеті дамыған Отырар қаласында әскербасының отбасында дүниеге келген. Білімге деген құштарлығының арқасында Әбу Насыр Әл-Фараби сол уақыттағы ғылым мен білімнің ордасы саналған Дамаск, Халеб, Каир, Шаш, Самарқан, Бұхара, Мерв, Нишапур, Рей, Хамадан қалаларында да болып, білімін үнемі жетілдірумен болды. Ол жерлерде көптеген ғұламалармен, ойшыл-ақындармен, қайраткерлермен танысып, сұхбаттасты. Тарихи деректер бойынша 70-ке жуық тіл білген. Өздігінен көп оқып, көп ізденген ойшыл философия, логика, этика, метафизика, тіл білімі, жаратылыстану, география, математика, медицина, музыка салаларынан «Кемеңгерлік меруерті», «Ізгі қала тұрғындарының көзқарасы», «Мәселелердің түп мазмұны», «Ғылымдардың шығуы», «Бақытқа жету», «Азаматтық саясат» атты еңбектер мен қатар 150-ге жуық трактаттар жазып қалдырды. Шығармаларында көне грек оқымыстыларының, әсіресе, Аристотельдің еңбектеріне талдау жасады.
Әбу Насыр әл-Фараби толық есімі Әбу Насыр Мұхаммад ибн Мұхаммад Тархан ибн Узлағ әл-Фараби (870 – 950 ж. ш.) – ойшыл, философ, социолог, математик, физик, астроном, ботаник, лингвист, логика, музыка зерттеушісі.
2019-жылғы 12-27-қараша аралығында Франция астанасы Париж қаласында өткен ЮНЕСКО-ның 40-шы Бас конференциясы ортағасырлық Шығыстың ғұлама ойшылы әрі ғалымы Әбу Насыр әл-Фарабидің 1150 жылдығын 2020-жылы аталып өтілетін халықаралық мерейтойлар тізіміне енгізу жөнінде арнайы қарар қабылдады. Осыған байланысты, 2020-жылдың 29-қаңтарында Алматы қаласы әл-Фараби атындағы ҚазҰУ-де Әбу Насыр әл-Фарабидің 1150-жылдық мерейтойын салтанатты ашу рәсімі болды. Мерейтойдың ашылуы аясында Әл-Фараби орталығы кітапханасының тұсаукесері, сонымен қатар ҚР Тұңғыш Президенті – Елбасының мәдениет саласындағы мемлекеттік стипендиясын тапсырды.
Салтанатты кеш шымылдығын ҚР Мемлекеттік хатшысы, Әбу Насыр әл-Фарабидің 1150 жылдық мерейтойын дайындау және өткізу жөніндегі Мемлекеттік комиссияның төрағасы Қ.Е. Көшербаев сөз сөйлеп ашты. Ол сөзінде залға жиналған қауымды өркениеттің ұлы ойшылы Әбу Насыр әл-Фарабидің 1150 жылдығы мерейтойын ресми ашу салтанатына келуімен құттықтап, Тұңғыш президентіміз – Елбасы Н. Назарбаев «Ұлы даланың жеті қыры» атты мақаласында әйгілі ғұлама ғалымның тұлғасы мен мұрасына лайықты баға бергенін атап өтті. «Әл-Фараби қазақ халқының ғана емес, бүкіл әлемдік өркениеттің рухани игілігі. Ислам және әлем философиясының жарық жұлдызы. Ол әлемді тануға және бүкіл адамзаттың рухани дамуына теңдесіз үлес қосты», – деп айтты.
Жалпы саны елуден астам елден қонақтар жиналған салтанатты кеште Алматы қаласының әкімі Б.Ә. Сағынтаевтың құттықтау сөзінен кейін шет елдік құрметті қонақтар тарапынан ЮНЕСКО-ның Қазақстан, Қырғызстан, Тәжікстан және Өзбекстан бойынша кластерлік бюросының директоры Криста Пиккатт, Ислам Ынтымақтастық Ұйымы Бас хатшысының орынбасары А.А. Мусинов, Сауд Арабиясының Білім және ғылым министрінің зерттеулер мен инновациялар жөніндегі орынбасары Nasser Mohammed Al-Aqeeli мырза, Каподистрия атындағы Афина ұлттық университеті Ортағасырлық философия және қайта өрлеу дәуірі кафедрасының қауымдастырылған профессоры Георгиос Стейрис (Грекия). Дамаск университетінің президенті Mohammed Maher Kabakibi (Сирия). Түркия Республикасы Мәжілісінің атынан депутат Metin Gündoğdu мырза құттықау сөз сөйледі.
Қонақтар Әбу Насыр әл-Фарабидің 1150 жылдық мерейтойын ЮНЕСКО деңгейінде атап өту, бұл мерекенің әлемдік сипатқа ие екендігін айтып, өзінің бүкіл ғұмырын ғылымға арнай отырып, артына ғылымның түрлі салалары бойынша өлшеусіз еңбектер қалдырған Ұлы ғалымның ойлы тұжырымдары мен рухани мұралары арқылы адамды тұлға ретінде тәрбиелеп, шынайы адами құндылықтарды бекітуге болады деп санайды және Ұлы ұстаздың кемеңгерлігі қазіргі уақытта да өте маңызды және зор мәнге ие болып қала беретініне сенімділігін білдірді.
Әл-Фараби атындағы ҚазҰУ ректоры Ғ.М. Мұтановтың құттықтау сөзінен кейін, концерттік бағдарламаға жалғасып, Тұран этно-фольклорлық ансамбілі, Нұрғиса Тілендиев атындағы ансамбл, Толқын Забирова және Сириялық музыкант Сима Маозини өз өнерлерімен жұртшылықты таң қалдырды.

Әл-Фараби атындағы ҚазҰУ-нің,
ЖОО-ға дейінгі білім беру факультетінің оқытушылары
Қ.С. Аширбекова, Г. Жұмаділ, С.А. Нусупбаева