ҚР-ның Тәуелсіздігінің 25 жылдығына орай бір қатар моңғолия азаматтары марапатталды

2016 Жыл 12 айдың 21 күні

KAZNEWS - Қазақстан Республикасының Тәуелсіздігінің 25 жылдығы және келер жылы атап өтілетін мемлекеттер арасындағы дипломатиялық қатынастардың 25 жылдығы аясында Моңғолиядағы Қазақстанның Елшісі  Қалыбек Қобландин бірқатар қоғам белсенділерін марапаттады.

Бұл туралы  Елшіліктің бірінші хатшысы Жүсіп Орынбай KAZNEWS AA тілшісіне хабарлап отыр.

Қазақстан мен Моңғолия арасындағы достық қарым-қатынастарды нығайтуға қосқан үлестері және аталған бағыттағы Елшіліктің жұмысына қолдау көрсеткен бірқатар моңғолиялық азаматтарға Елші Қалыбек Қобландин мырза «Қазақ хандығының 550 жылдығы» мерейтойлық белгісі мен алғыс хаттар табыс етті.

Атап айтқанда, өткен жылы Улаанбаатарда өткен «Қазақ хандығына 550 жыл: Қазақстан-Моңғолия тарихының өзекті мәселелері» тақырыбында «дөңгелек үстелді» ұйымдастыруға атсалысқан Моңғолия Ғылым академиясының жанындағы Халықаралық қатынастар институтының директоры Жамсарын Баясах мырза және ғалым, профессор Ислам Қабышұлына «Қазақ хандығының 550 жылдығы» мерейтойлық белгісімен марапатталды.

Сондай-ақ, аталған мерейтойлық белгімен доктор, экс-депутат Бәкей Ағыпарұлы және белгілі ақын Байыт Қабанұлы марапатталса, Моңғолияның Ғылым және технологиялар университетінің кітапханасы басшысы, профессор Гүлнәр Чәкерханқызы мен Улаанбаатар қаласындағы қазақтар қауымдастығының өкілі,  белгілі дәрігер Асай Рәмішұлына Елшіліктің  алғыс хаттары табыс етілді.

Сонымен қатар Елшілік Қазақстан Республикасы Ақпарат және комуникациялар министрлігі атынан моңғолиялық қоғамдағы қазақ тілді баспасөз «Моңғол Заман» газетінің бас редакторы Асылбек Рахатұлын «Баспасөз саласының үздігі» медалімен марапаттады.

Осы орайда Моңғолия журналистер одағының Баян-Өлгий аймағындағы бөлімшесінің басқарма мүшесі Асылбек Рахатұлы елшілік қызметкері, тілшілік қызметті қатар алып жүрген Нұрбота Білімқызына ақпарат саласындағы белсенді еңбегі үшін Журналистер одағының "2016 жылғы Үздік журналист " марапатын табыс етті.

Естеріңізге сала кетсек, жоғарыда аталған айтулы мерейтойларды атап өту аясында Улаанбаатар қаласында Елшілік ұйымдастырған ресми қабылдау барысында Моңғолияның Тұңғыш Президенті Пунсалмагийн Очирбат мырзаға «Қазақстан Республикасының Тәуелсіздігіне 25 жыл» мерейтойлық медалі, белгілі қоғам қайраткері, драматург, жазушы, Моңғолияның Венгриядағы бұрынғы елшісі Солтан Тәукейұлына екінші сыныпты «Достық» ордені табыс етілгенін Kaznews хабарлаған болатын.

Құрметті марапат иелері, ардақты ағайын, сіздерді тағы бір мәрте лайықты еңбектеріңізге орай алған марапаттауларыңызбен құттықтай отырып, келе жатқан жаңа жылда жаңа табыстарға жете берулеріңізге тілектестігімізді білдіреміз!



пікір қалдыру
АНХААРУУЛГА: Уншигчдын бичсэн сэтгэгдэлд www.kaznews.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
ПІКІРЛЕР: 0