Connect with us

Жаңа есім

Нұрсұлтан Жеңісханұлы: Арманым – аймағымызда ғылыми-технологиялық парк құру

Published

on

10 қаңтар, KAZNEWS. «Тояа – Грейпсийд» оқыту орталығының негізін қалаушы, Назарбаев университетінің магистранты Нұрсұлтан Жеңісханұлы Казньюс агенттігінің «Іскер азамат» бағдарламасының кезекті қонағы болып отыр.

Нұрсұлтан Жеңісханұлы 1993 жылы Баян-Өлгий аймағы орталығы Өлгий қаласында дүниеге келген. 2010 жылы Моңғол-түрік орта мектебін, 2015 жылы Түркияның Стамбул қаласындағы Мармара университетін механик-инженер мамандығымен тәмамдаған. Сол оқу орнынан магистратураға шақырылып Түркияның Ғылыми орталығында 200.000 доллардың жобасында жұмыстауға жолдама алып, кейін анасының денсаулығына байланысты елге оралған. 2016 жылы Австралияның UNSW (University of New South Wales)-тің магистратурасы емтиханынан өткен, 2018 жылы Венгрияның Девресени университеті магистратурасына, 2019 жылы Венгрияның ең таңдаулы академиялық жоғары оқу орны саналатын BME (Budapest University of Technology and Economics) – ға 100% пайыздық магистратура грантына қабылданып белгілі себептермен бас тартқан. 2020 жылдан Назарбаев университетінің механик және ұшақ (ғарыштық) инженері (Mechanical and Aerospace Engineering) магистрантурасында оқып жатыр.

Мекенжайы: Баян-Өлгий аймағы, Өлгий қаласы
Жұмыс орны мен лауазымы: “Тояа – Грейпсийд” оқу орталығының және “Алтай моунт” компаниясының директоры
Әлеуметтік желідегі парақшасы: Nurka Jyeniskhan (FB)
Қолданатын компьютері: MacBook

Жаңа кәсіп бастауға не себеп болды? 

2016 жылдан бастап, жергілікті жастардың білім алуын қолдау мақсатында қаржы құйып, ағылшын тілін оқыту орталығын аштым. Осы мерзімде балаларға бала кезінен бастап тіл үйрету қажеттілігін ұғынып, Баян-Өлгий аймағына 2019 жылы «Тояа» Балаларды дамыту академиясы бөлімшесінің соробан /жапон/ шоты және мидың оң жақ бөлігін дамыту оқыту орталығын аштым. 2020 жылдың қыркүйек айынан бастап, 4-9 жастағылардың халықаралық ағылшын тілі бағдарламасы саналатын Жапонияның Грейпсийд бағдарламасы патентін алып, Баян-Өлгий аймағында табысты жүзеге асырып жатырмын.

2016 жылдан бастап, «Үш-Төбе» компаниясында механик-инженер болып істеймін. 2018 жылы «Алтай Моунт» туристік компаниясын құрып, отбасылық бизнес ретінде еңбек етудеміз.

Бағыма орай Мармара университетінде инженер студенттерге арналған арнайы бағдарламасы болды. Оның басты мақсаты – бір шеңбердің ішінде ойлаудан ада болып, еркін ойлау жүйесін қалыптастыруға көмектесу болатын. Бұл бағдарламаның ең үлкен серіктесі халықаралық пайда көздемейтін үкіметтік емес ұйым JCI (Junior Chamber International) болды және олар аптасына бір рет инженер саласында білім алатын студенттерге дәріс оқитын. Үлкен табысқа жеткен бизнесмендер мен карьера қалыптастырған адамдарға кездесу мүмкіндігіне ие болып, басқаша ойлай бастадым. Былайша айтқанда, сол мырзалар мен ханымдарды мақтаныш етіп, солар сияқты болуға ұмтылдым.

Менің ең жақсы көретін ісім, бұл – сабақ үйрету еді. Студент болған кезімде 4 жыл бойы түрік балалармен қоян-қолтық жұмыстадым әрі сабақ үйрету менің ұнататын ісіме айналды. Содан кейін туған өлкемнің бір үлкен мәселесі білім саласын жақсартуға бар күшіммен ат салысуға шешімін қабылдадым. Білім саласы кез келген елдің даму тетігі деп айтуға болады.

Сіз аймағымызда алғашқы оқыту орталықтарының бірін аштыңыз. Ата-аналарға қандай кеңес бересіз?

Жаңа түсінік қалыптастырудың өзіндік қиындықтары мен мәселелері бар. Алғаш оқыту жүргізген кезде адамдар мен оқушылардың арасында IELTS пен шетелде білім алу мүмкіндіктері жайлы түсінктері өте таяз еді. Шетелдік гранттық бағдарламалар немесе ең таңдаулы оқу орындарына қабылдану үшін өте көп қажыр-қайрат, еңбек пен уақыт қажет болатындықтан ата-аналарға балаларыңызға жастайынан көп қаржы құю қажет деп кеңес бергім келеді. Білім саласының бір осал жағы ол нәтиженің ұзақ мерзімнен кейін шығатындығы болғандықтан өте төзімділікті қажет етеді.

IELTS дегеніміз не? Балаларға түсіндіріп берсеңіз?

IELTS (International English Language Testing System) – ағылшын тілін білу деңгейін бағалаудың халықаралық жүйесі. Емтихан қабылдаушылар мәтінді түсіну (Reading), сөйлеу (Speaking) және жазу (Writing) қабілетін тексереді.
IELTS-тің 2 түрі бар: General training және Academic. General модулі мектепке қабылдануға, тұруға ықтиярхат алуға, терең білімді қажет етпейтін жай ғана жұмысқа тұруға бағытталған. Academic модулі студенттер мен жоғары оқу орындарының түлектеріне арналған. IELTS-ты қағазбен (Paper Based IELTS) сонымен бірге компьютермен (Computer-delivered IELTS) тапсыруға болады.

IELTS тапсыруға дайындықты неден бастау керек?

Алдымен бұл емтиханды не үшін тапсырығыңыз келетін себебіңіз нақты болуы қажет. Қайда барғысы келетінін білмейтін адам адасып қайтып кетеді. Сол сияқты бағытыңыз бен мақсатыңыздың айқын болғаны жөн. Тек қана IELTS емтиханын тапсыру жеткіліксіз болады. Бұл тек алғашқы баспалдақ. Біздің аймақтағы жетіспейтін бір нәрсе – менторшип бағдарламасы. Бұл бағдарлама қысқа мерзімде уақыт ұтқызбай дұрыс шешім қабылдауға көмектеседі және жол көрсетеді.

Тест құрылымы қандай болады және қалай бағаланады?

Емтихан Listening (тыңдау), Reading (оқу), Writing (жазу) және Speaking (әңгімелесу) қатарлы 4 бөлімнен құралып, әрқайсысы 9 ұпаймен бағаланады. Әрқайсысынан жинаған ұпайлар біріктіріліп, орташа ұпайын шығарғандағы нәтиже IELTS емтиханынан алған жиынтық ұпай болып есептелінеді.

IELTS -тен жоғары балды қалай жинауға болады? Қандай лайфхактарды қолдануға болады?

Тыңдау мен әңгімелесу қабілеті, жазу мен оқу қабілеті өзара байланыста болады. Былайша айтқанда, тыңдау қабілеті жақсарған сайын әңгімелесу деңгейі де жақсарады. Ағылшын тілінде телехиқаяларды көп көрген адамның тыңдау қабілеті адамның табиғатына сәйкес арта түседі. Ал кітап оқу әдеті адамның оқып түсіну, білмейтін сөздері мағынасын жуық мағынасымен долбарлап тауып алуына көмектеседі. IELTS – бұл өте көп қажыр-қайратты талап ететін емтихан. Сондықтан еш мойымау керек. Бірақ мақсаты айқын адам оңайға түсіп бермейді. Жалпы қосымша ретінде ғаламторды өте жақсы пайдаланған жөн. Онда не іздесеңіз, бәрі бар. Ал оқушылардың мақсаты оқыту орталығын уақыт үнемдеу бағытында пайдаланып, өте қысқа мерзімде мақсатына жету көпірі ретінде қолдана білу керек.

Өзіңіздің жұмыс жүргізудегі әдіс-тәсіліңіз қандай? Ағылшын тілін үйрену үшін балалардың қызығушылығын қалай арттыруға болады?

Менің әдістемем өте қарапайым. Ағылшын тілін теориялық тұрғыда емес, шынайы өмірде қолдану жағынан үйретемін. Балаларға ағылшын тілінің қажеттіллігін жақсылап түсіндіріп берсеңіз, өздері-ақ талаптанып үйрене бастайды. Бұл оның қызығушылығы ояна бастағанын білдіреді. Жалпысы ең басты қабілетті атаңыз десеңіз жеке басын алып жүру қасиеті деп айтар едім. Әлемнің қай түкпіріне барсаңыз да, білім алумен қатар тіршілігіңізді де қатар алып жүресіз деген сөз. Біздің аймақта бір байқалған жағдай балалардың жеке басын алып жүруде босаңдығы. Осы жағдайдан болып, өзіне қатысты шешім қабылдауда мәселелер туындайды.

«Грейпсийд» оқу бағдарламасы жайлы да айтып берсеңіз?

Ағылшын тілін үйренудің ең қолайлы уақыты – адамның миы мен басқа да бұлшық еттері дамитын балалық шақ. Сонымен қатар тіл үйренудің ең тиімді әдісі баланың табиғи жолмен /тілі ұстарту/ үйретуге болатынын анықтап, дамытатын тәсіл. Тыңдау, түсіну, жауап беру, дұрыс сөйлеу, дұрыс оқу, оқығанын түсіну, жазу дағдысын қалыптастыру қабілеттерін балаға бір жүйемен қалыптастыратын, 3-12 жас аралығындағы балаларға арналған өте нәтижелі бағдарлама. Әрі үйренген ұғымдарын жаңа заманға сай жасалған аппликейшн /бағдарлама/ пайдаланып бекіту, пысықтау артықшылығы бар.

Тәуліктік жұмыс күніңіз қалай басталады? Уақытты қаншалықты тиімді пайдаланасыз?

Таңғы 9:00-да баламды балабақшаға апарып, 9:30-да магистратура сабағы мен жұмысымды 16:00-ге дейін аяқтаймын. Ұлымды балабақшадан үйге жеткізіп салған соң 17:00 – 20:00 сағат аралығында оқушылармен жұмыс жасаймын. 23:00 сағатқа дейін отбасыммен бірге болып, түнгі 02:00, кейде 03:00 сағатқа дейін қызығушылығым бойынша зерттеу жүргізіп, кей уақытта үй тапсырмасын орындап, кинофильм көремін. Кино көруді жаным сүйетіндіктен уақытымды соған сәйкестіруге тырысамын. Өзімді дамытумен қатар отбасымды дамытуға да көңіл бөлемін. Сенбі, жексенбі күндері де жоғарыға ұқсас өтеді. . Жексенбі не мереке күндері жұмыс пен мектеп жұмыстарын аздап ысырып тастап, мүмкіндігінше отбасы мен достарыммен бірге боламын. Әлемді жайлаған індет кезіндегі крантинге байланысты уақыт кестесіне аздаған өзгерістер енгізілді.

Ең көп қолданатын және жақсы көретін апликейшндеріңіз /бағдарламалар/?

YouTube, Gmail, Ted, Netflix, Zoom, Google Calendar, Google Classroom, Bundle бағдарламаларын тұрақты пайдаланамын.

Жетістікке жетудің құпиясы неде?

Уақытты ұтымды пайдалану. Төзімділік. Алған бетіңнен қайтпау.

Қазір қандай іспен айналысып жатырсыз? Қысқа мерзімдегі жоспарыңыз?

Магистратураны табысты бітіріп, әлемге әйгілі университеттің бірінен докторлық диссертация қорғау. Карьералық тұрғыда академия немесе университетте оқытушы, ғылыми зерттеу бағытындағы компанияның сараптама және дамыту қызметкері болу. Тәжірибе жинақтап алған соң аймағымызға келіп, ғылыми-технологиялық парк құруға бар күшімді жұмсаймын.

Жуықта қандай кітап, мақала оқыдыңыз?

Дәл қазір Ли Куан Ю-дің «Сингапурдың даму құпиясы» кітабын оқып жатырмын. Күнделікті әртүрлі тақырыптардағы мақалаларды да көп қараймын. Digital Twin in Aerospace Industry туралы оқудамын. Магистратуралық диссертацияда осы тақырыпқа қатысты зерттеу жасауды жоспарлап отырмын.

Сіз кімнен, неден күш- қуат аласыз?

Мен Илон Маскге таң қаламын және оған ұқсауға тырысамын. Күш-қуатты алға қойған мақсатымнан аламын. Көбінесе, ұлыма қараған сайын қанат біткендей болып, күш-қуатты сезінемін. Ұлыма келешекте көп таңдау мүмкіндігін жасау үшін жұбайым екеуіміз оқу орталығын ашып, арнайы бағдарламарды енгізіп, жүзеге асырудамыз.

Өміріңізде алған сабағыңыз?

1. Мүмкіндік қай кезде де болады. Қателесуден қорықпа.
2. Үрейге бой алдырма. Жігерлі бол.
3. Мүмкіндіктерді дер кезінде пайдалана біл.

Жастарға берер кеңесіңіз?

1. Отбасыға көп уақыт пен назарыңды бөл. Олармен бірге бол. Өмір өте қысқа.
2. Ең алдымен әділ бол. Бұл қазіргі қоғам құндылығы әрі адамшылық қасиетің.
3. Өз көзқарасың, мақсатың және қағидаң болсын.
4. Сыни көзбен қарай біл. Бұл 21-ғасырдың ең маңызды қабілеттерінің бірі.

Әңгімеңізге рахмет!

KAZNEWS ақпараттық агенттігі

Жаңа есім

Берікбол Әкебайұлы: Басты мақсатымыз – әлемдік бәсекеге қабілетті ұрпақ тәрбиелеу

Published

on

29 қараша, KAZNEWS. Казньюс ақпараттық агенттігінің «Іскер азамат» жобасының кезекті қонағы Берікбол Әкебайұлы.

Берікбол Әкебайұлы, туған жылы 1987, туған жері Баян-Өлгий аймағының Ногооннуур сұмыны. Баян-Өлгий аймағының Ногооннуур сұмынындағы жалпы білім беретін мектептің түлегі. 2009 жылы Қобда университетін орыс-ағылшын тілінің мұғалімі мамандығымен тәмамдаған. Ресей Федерациясының Барнаул қаласында орналасқан Алтай мемлекеттік университетіне магистратураға жолдама алған. 2010 жылы Қобда университетінде магистратурасын сәтті аяқтап, Прогресс аға мектебінде алғашқы еңбек жолын бастаған. 2012 жылы арман қуып Түркияға докторантура оқуға аттанады. 8 жыл білімін жетілдірумен қатар, мамандығы бойынша жұмыс жасайды. Бүгінгі таңда Баян-Өлгий аймағында орналасқан «Дарын» кешенді мектебінде ағылшын тілі пәнінің ұстазы, «Алтай академиясының» директоры болып қызмет атқарып, шәкірт тәрбиелеп жүр.

Мекенжайы: Моңғолия, Баян-Өлгий аймағы
Қызметі: «Алтай академиясының» директоры
Әлеуметтік парақшаcы: Berik Akebai (FB)

ТІЛ ҮЙРЕТУ ОРТАЛЫҒЫН ҚҰРУ ИДЕЯ ҚАЛАЙ КЕЛДІ?

Еңбек жолымды Қобда аймағынан бастап, Түркияда жалғастырып жүргенде өзімнің жұмыс істеген ортамдағы жастардың білімге құштарлығын оятып, білім жолында жетістікке жетулеріне көмектесіп отырдым. Сол сәтте неге өзім туған қара мекенге барып, жеткіншек іні-қарындастарымның халықаралық беделді жоғарғы оқу орындарына жолдама алуға жол көрсетіп, қолдан келген көмегімді беруге болмасқа? – деген сауал туындады.

Атақты Хенри Фордтың «Мың жылдың қамын ойласаң адам қорын дамыту керек»-деген нақыл сөзі бар. Біз болашақта дамыған елдердің қатарынан көрінуді армандасақ бірінші саналы да сауатты ұрпақ, әлемдік бәсекелістікке қабілетті ұрпақ тәрбиелеуміз қажет. Алтай академиясын орнатуға түрткі болған себепте осы. Бұл өзімнің қоғам алдындағы жауапкершілігімді терең түсініп, аймағымыздың оқу сапасын арттыруға хал-қадірімше үлес қоссам деген шын көңілден туған идея еді. Міне, жүзеге асырып отырғаныма қуаныштымын.

«Әр нәрсе өз уақытында жасалады» деген қағиданы қатаң ұстанамын.

СІЗДІҢ ЖҰМЫС ТӘСІЛІҢІЗ ҚАНДАЙ? ОРТАША ТӘУЛІКТІК ЖҰМЫС КҮНІҢІЗ ҚАЛАЙ ӨТЕДІ?

Менің күнделікті жұмысым әр апта, тұрақты түрде таңертеңгі 8 сағаттан кешкі 20 сағатқа дейін жалғасады. Яғни аптаның 7 күнінде де жұмыс жасаймын. Жұмыс жоспарым айлық, апталық және күндік ретімен жоспарланады. Бүгінгі істі ертеңге қалдыруды қаламайым. Сондықтан «Әр нәрсе өз уақытында жасалады» деген қағиданы қатаң ұстанамын. Өйткені уақыт алтын. Алла Тағала алдында да сұралатын дүниеміздің ең маңыздысы уақытымызды қалай өткізгеніміз жайылы екенін жақсы білесіздер. Сондықтан әр күнімді, әр сағат, әр минутімді тиімді пайдаланып, қолымнан келгенше сауапты жақсы істерге жұмсауға тырысамын.

ЖҰМЫСЫҢЫЗДЫҢ ЕРЕКШЕЛІГІ НЕДЕ? ОҢ ЖӘНЕ КЕРІ ӘСЕРЛЕРІ?

Ниеті таза, жүрегі мен ой санасы таза, оқуға құштар, білсем, үйренсем деген ниетті оқушылармен жұмыстаудан күш, қуат аламын. Мұғалім мамандығының бір ерекшелігі ол «адам-адам» жүйесінде жұмыс жасауы. Істеген ісіңнен ләззәт алудың сыртында, оқушылардан позитив энергия алу арқылы өмірге деген құштарлығыңыз еселеп артып отырады.

«Ұстаздық еткен жалықпас,
Үйретуден балаға,
Ақырын жүріп, анық бас,
Еңбегің кетпес далаға» – деп Абай атамыз айтқандай, бізден білім алған жастарымыз қоғамға пайдасы тиетін, салиқалы азамат болып қалыптасса еңбегіміздің өтеуі осы деп білеміз.

 

УАҚЫТ ҮНЕМДЕУДІҢ ҰТЫМДЫ ТӘСІЛІ НЕ?

Барлық нәрсе ретімен, жоспармен болуы қажет. Уақыттың ағымымен емес, уақытты өз ықпалыңа сәйкестіріп өмір сүру.

ЕҢ КӨП ҚОЛДАНАТЫН, ПАЙДАЛАНУҒА ҚҰШТАР ЖҰМЫС ҚҰРАЛЫҢЫЗ, ҚОЛДАНБАЛЫ БАҒДАРЛАМАЛАРЫҢЫЗ ҚАНДАЙ?

Бүгінгі ғылым-техника дамыған XXI ғасырда, көптеген ақылды техникалық құралдарды дұрыс қолдану арқылы жұмысыңызды жеңілдете аласыз. Қолданатын құралдарым ұялы телефон, компьютер және киндл (kindle). Мысалы компьютерді іс-қағаздар жазуға, ұялы телефонды алыс-жуықтағы жұмыстарымды жүргізуге, киндлді кітап оқуға қолданамын. Қолданбалы қондырғылар дейтін болсақ көбінесе тіл үйрену және үйрету қондырғыларын көп қолданамын.

АТҚАРЫЛАТЫН ІСТЕР ТІЗІМІН ҚАЙДА БЕЛГІЛЕП, ҚАЛАЙ ЖҮРГІЗЕСІЗ?

Телефонның Notes яғни белгілеу програмы арқылы белгілеймін.

СІЗ НЕНІ ІСТЕУГЕ ШЕБЕРСІЗ?

Мен жаңа нәрсе үйренуге, жаңашылдықты қабылдауға шебермін. Уақытым болса шетел тілдерін зерттеп, үйренуге құштармын. Сондай-ақ спортпен шұғылданып, ән салуды да ұнатамын.

ҚАЗІР ҚАНДАЙ ЖҰМЫСҚА НАЗАР АУДАРЫП ЖАТЫРСЫЗ?

Халықаралық және мемлекеттік әр түрлі емтихандарға оқушылар дайындау үстіндемін. Бұл емтихандардың нәтижесі олардың жарқын болашағына оң ықпал ететін болғандықтан, осы іске бар ынта жігерімді жұмсаудамын.

КІТАП КӨП ОҚИСЫЗ БА? ДӘЛ ҚАЗІР ҚАНДАЙ КІТАП НЕМЕСЕ МАҚАЛА ОҚУДАСЫЗ?

Иә, көп оқимын. Дәл қазір жеке адамның дамуы мен қалыптасуы туралы ұзақ жылғы зерттеулер нәтижесінде жазылған Stephen R.Covey-дің «The 7 habits of highly effective people» немесе «Жоғарғы табысқа жеткен адамдардың жеті дағдысы» атты кітабын оқудамын. Өзімнің мамандығым және оқушылардың тәлім-тәрбиесіне байланысты кітап және мақала, зерттеулерді көп оқимын.

СІЗДІҢ МІНЕЗІҢІЗ ТҰЙЫҚ ПА ӘЛДЕ АШЫҚ ПА?

Әр адамның мінезі, астындағы тұлпары. Бүгінге дейін мінезіңіз тұйық деп айтқан адамды кездестірмедім (күлді). «Жақсыда жаттық келеді, жаман аптық келеді» дейді қазағымыз. Адамдармен мейілінше сыпайы қарым-қатынас жасап, жаттық болуға тырысамын.

СІЗ ҚАНША УАҚЫТ ҰЙЫҚТАЙСЫЗ?

Үш арсыздың бірі ұйқы болғандықтан мен ұйқымды жеңуді бала кезімнен қолға алған адаммын. Кейбір сәтте қарбалас жұмысқа байланысты өте аз сағат ұйықтауға тура келеді. Әйтседе, 5-6 сағат ұйықтауды әдетке айналдырдым.

ЖҰМЫС КЕЗІНДЕ МУЗЫКА ТЫҢДАЙСЫЗ БА? ҚАНДАЙ ӘУЕНДЕРГЕ ӘУЕССІЗ?

Өнер мен білім құстың қос қанатындай дүние деп ойлаймын. Жұмыс кезінде көбінесе классикалық музыкалар мен қазақтың домбырада шерткен күйлері мен әндерін тыңдауды ұнатамын. Әрине мамандығымыз шетел тілі пәнінің ұстазы болғандықтан шет тілді әндерді де тыңдауды ұмытпаймын.

СІЗДІ ЖҰМЫСТАН ТЫС УАҚЫТТА ҚАЙДАН ТАБУҒА БОЛАДЫ?

Кітапхана мен спорт залдардан, демалыс күндері кофе шоптардан… (Күлді).

КІМДІ ҮЛГІ ТҰТАСЫЗ? КІМНЕН, НЕДЕН КҮШ ҚУАТ АЛАСЫЗ?

Абайды үлгі тұтамын. Өйткені қазақы болмыс, биік қасиет Абай атамыздың сөздерінен табылады. Қазіргі жастар әртүрлі шетелдік талант иелеріне тамсанып, таңдай қағып еліктеп жатады. Бірақ, талант бір басқа, ұлттық болмыс ол бөлек әңгіме. Қытайдың Күнзісі, Немістің Гетесі, Ресейдің Толстойы, Ағылшынның Шекспирінен Абайдың бірді-бір кем түсетін жері жоқ. Керісінше кейбір тұстарда ой салмағы басым түсіп жатады. Сондықтан, Абайды оқу арқылы ұлттық құндылықтарымызды танып, біліп, болашақ қазақ жастарын Абайдың тағылымы мен тәрбиелеуге болады.

Адал еңбек арыңды кірлетпей, алысқа жетелейді. 

ӨМІРДЕН АЛҒАН ЕҢ ЖАҚСЫ ҒИБРАТЫҢЫЗ…

Адал еңбек арыңды кірлетпей, алысқа жетелейді. Өзіңді басқаларға мойындату үшін сөз емес, іс маңызды, дегенді жан-тәніммен түсіндім. Табысқа жету үшін тынбас талап, қажырлы еңбек, мұқалмас жігер керек. Менің өмірден алған ғибараттарым осы.

АҒЫЛШЫН ТІЛІН ЖАҚСАРТУ ҮШІН НЕ ІСТЕУ КЕРЕК ДЕП ОЙЛАЙСЫЗ?

Қазіргі жаһандану заманында барлық халықтың ортақ байланыс құралына айналған ағылшын тілін үйрену әр адамға жаңа мүмкіндік тудыратыны сөзсіз. Заманауи ғылым мен техниканы жеттік меңгеру үшін де ағылшын тілі ауадай қажет болып отыр. Өкініштісі біздің жастардың көбісі не үшін ағылшын тілін үйренгісі келетінін білмейді.
Сондықтан ең бірінші мақсат айқын болу қажет. Өзінің ағылшын тілі білімінің деңгейін білу арқылы арықарай білімін жетілдіруге арнайы уақыт жұмсаған жөн. Өзіне уақыт шығарып, оқу, жазу, тыңдау, сөйлесу қатарлы дағдыларды тең дәрежеде меңгеру арқылы қысқа уақыт ішінде ағылшын тілін үйренуге толық мүмкіндік бар.
Әрине, ағылшын тілін үйренгісі келетін жастарға біз көмектесе аламыз.

Алтай академиясына байланыс жасау: 9587-4848

ӘҢГІМЕҢІЗГЕ РАХМЕТ!

КАЗНЬЮС АҚПАРАТТЫҚ АГЕНТТІГІ

Continue Reading

Жаңа есім

Жалғас Әділбаев: Екі елдің ынтымақтастығын дамыту – біздің негізгі мақсатымыз

Published

on

08 қараша, KAZNEWS. Улаанбаатар. Қазақстан Республикасының Моңғолиядағы Төтенше және Өкілетті Елшісі Жалғас Әділбаев Жұмаұлы Казньюс ақпараттық агенттігіне сұхбат берді. 

Сұхбаттан Елші мырзаның жұмыс тәсілі мен Қазақстан-Моңғолия арасындағы қарым-қатынастардың келешегі туралы қысқаша ақпараттар алатын боласыздар.

Мәртебелі елші мырза! Бізге сұхбат беруге келіскеніңіз үшін алғысымызды білдіреміз! Бүгінге дейінгі жұмыс карьераңыз қандай болды?

Сұрағыңызға рахмет! Мен осы Сыртқы істер Министрлігінің жүйесінде 23 жыл қызмет етудемін. Министрлікте алдымен Кеңесші болып жұмысымды бастағанмын. Кейіннен Орталықта Басқарма басшысы, Департамент директоры, Комитет Төрағасының орынбасары, Ерекше тапсырмалар жөніндегі Елші қызметтерінде, ал Қазақстан Республикасының шет елдердегі Елшіліктерінде, соның ішінде Литва Республикасында, Австрия Республикасында, Иран Ислам Республикасында, Арменияда Кеңесші, Кеңесші-Уәкіл, Бас консул лауазымдарында қызмет атқардым.

2019 жылдың қыркүйек айынан бастап Қазақстан Республикасының Мңғолиядағы Төтенше және Өкілетті Елшісі болып тағайындалдым.

Орташа тәуліктік жұмыс күніңіз қалай өтеді?

Жұмысқа таңертеңгі сағат 8:30-да келемін, содан кешкі 19:30-ға дейін жұмыс істейміз. Сенбі күндері де сағат 13:00-ге дейін жұмыста болып, сосын үй шарушылығымен айналысып, жексенбі күндері демалуға тырысамыз.

Кейде жанұмызбен қала сыртына шығамыз, түрлі демалыс орындарына барамыз. Қазіргі әлемді, елді жайлаған пандемияға байланысты көбіне үйде боламыз.

Сіздің жұмыс тәсіліңіз қандай?

Жұмыстарымды алдын-ала жоспарлаймын. Барлық шараларды алдын-ала пысықтап, жан-жақты дайындап, тиянақты жұмыс істеуге тырысамын. Біздің жұмысымызда барлық мәселе өте маңызды болғандықтан, әрбір нәрсені егжей-тегжейлі пысықтауға тырысамыз.

Жұмысыңыздың ерекшелігі неде? Оң және кері әсерлері?

Жұмысымыздың ерекшелігі көп, екі елдің арасындағы маңызды жұмыстар мен шаралар болғандықтан, ең бастысы, жұмысымыз адам өміріне де қатысты болғандықтан қате жібермеуіміз керек. Әрбір айтқан сөзің ел атынан айтылатын болғандықтан, күні бұрын дайындалалып, айтар сөзіңді саралап, әрбір айтылған сөзге жауаптысың. Оң әсері де өте көп, оның себебі, сенің еліңнің абыройы көтерілген сайын, біздің де жұмысымыздың қорытындысы көрінеді.

Уақыт үнемдеудің ұтымды тәсілі не?

Уақыт үнемдеудің ұтымды тәсілі – оны жоспарлау, сонымен қатар тек өз уақытыңды емес, өзгенің де уақытын қадірлей білу деп ойлаймын.

Атқарылатын істер тізімін қайда белгілеп, қалай жүргізесіз?

Өзімнің жұмыс үстелімде күнделігім бар, соған барлық кездесулерімді, болатын шараларды күні бұрын жазып қоямын. Алдын-ала кіммен телефон арқылы, қандай мәселелермен сөйлесу керектігін дайындап алуға тырысамын.

Кімнен, неден күш қуат аласыз?

Жүргізген ісімізден, мағыналы өткен шаралардан қуат аламыз. Бұған қоса, балаларымның жеңістері, бауырларымның амандығы мен өзара бірлігі де қосымша қуат береді.

Сіз кәсіби қызметіңізден бөлек нені істеуге шеберсіз?

Кітап оқығанды жақсы көремін, кітап таңдауға шебермін деп ойлаймын. Жаяу жүргенді жақсы көремін.

Қазір қандай жұмысқа назар аударып жатырсыз? Қазақстан-Моңғолия арасындағы қарым-қатынастардың келешегін Сіз қалай болжамдайсыз? Қойылған мақсаттарға жету үшін екі тарап не істеуі керек?

Екі елдің ынтымақтастығын дамыту – біздің негізгі мақсатымыз. Соңғы жылдары Қазақстан Республикасы мен Моңғолияның арасындағы өзара ынтымақтастық жоғары деңгейге көтерілді деп айта аламын.

Оның басты себебі – 2019 жылы 10-12 қазанда Моңғолияның сол кездегі Премьер-министрі У.Хүрэлсүхтің Қазақстанға ресми сапары көлемі жағынан зор, мәні жағынан терең де мағыналы сапар болды.

Осы сапардың барысында Моңғолия Премьер-министрінің ҚР Тұңғыш Президенті – Елбасы Н.Назарбаевпен кездесуі және ҚР Премьер-министрі А.Маминмен өткізген келіссөздерінде көп жылдардан бері қордаланып келген екіжақты қатынастардағы өзекті мәселелер шешіліп, сауда-экономикалық ынтымақтастықты қамтыған көптеген салаларды бірлесіп алға жылжыту бойынша уағдаластықтарға қол жеткізілді.

Қазіргі таңда Моңғолия-Қазақстан Сауда-экономикалық, ғылыми-техникалық және мәдени ынтымақтастық жөніндегі үкіметаралық комиссия өз жұмысын жемісті атқарып жатыр.

Мәдени-гуманитарлы салада ҚР мен Моңғолия арасында 8 келісім-шартқа қол қойылды.

Бұған қоса, 2021 жылдың 10-13 қазанында Моңғолияның Сыртқы қатынастар Министрі Б.Батцэцэгтің Қазақстанға тәуелсіздік алғаннан кейінгі жылдардан бергі алғашқы ресми сапары болып өтті. Осы сапар барысында Б.Бацэцэг ханым Қазақстан Республикасының Президентімен, Үкімет басшысымен және Сыртқы істер, Сауда Министрлерімен кездесіп, екі ел арасындағы өзекті мәселелерді талқылады.

Өмірден алған ең жақсы ғибратыңыз…

Үлкенді құрметтеу, кішіге қамқор болу. Қолдан келгенше көмек көрсету.

Жас мамандарға қандай кеңес бересіз?

Өз мамандығын қадірлеп, жақсы маман болуға тырысу. Үнемі ізденіп, өзінің кәсіби біліктілігін жетілдіру. Көп оқып, көп білу. Жұмысына беріліп, ұқыпты, тиянақты маман болуға тырысу.

ӘҢГІМЕҢІЗГЕ РАХМЕТ!

КАЗНЬЮС АҚПАРАТТЫҚ АГЕНТТІГІ 

Continue Reading

Жаңа есім

М.Ибрай: Жаңа тұрғын үйлердің зерттеу, санағын жасадық

Published

on

Құрылысты дамыту орталығы директорының орынбасары М.Ибрай: Жаңа тұрғын үйлердің зерттеу, санағын жасадық.

-Құрылысты дамыту орталығы, “Барилга.мн” сайтымен бірлесіп жаңадан пайдаға берілген тұрғын үйлердің санағы мен зерттеуін жасады. Осы зерттеудің маңызы мен мақсаты туралы ақпарат берсеңіз?

-Улаанбаатар қаласындағы ғана емес еліміз көлеміндегі тұрғын үйлер мен жеке тұрғын үйлерге сұраныс пен ұсынысты анықтау, тұрғын үйлердің бағасын зерттеу, сондай-ақ, пандемия құрылыс саласына және шаруашылық бірліктерге қалай әсер етіп жатқандығын айқындау, кәсіпкерлерге кездесіп отырған мәселелерді шешу мүмкіндіктерін қарастыру мақсатында зерттеу жасадық. Жаңадан пайдаға берілген тұрғын үйлер санағын 2021 жылдың үшінші мезгілінде аяқтап, “Тұрғын үйлер ақпарат қорын” әзірлеудеміз.

-Биыл Улаанбаатар қаласында қанша тұрғын үй пайдаға берілді?

-Улаанбаатар қаласы көлемінде салынып жатқан жаңа тұрғын үйдің 240 жобасы, жеке тұрғын үйдің 118 жобасы, яғни, барлығы 358 жоба атқарылуда. Бүгінгі жағдаймен осы жылы 13560 ауылдық тұрғын үй, 1997 жеке тұрғын үй пайдаға берілді.

-Зерттеуге қамтылған тұрғын үйлердің шаршы метрінің орташа бағасы қандай?

-Біз жаңа тұрғын үйлердің баға санаттарын салыстыра отырып сауалнама жүргіздік. Улаанбаатар қаласында стандарт тұрғын үйлердің шаршы метрінің орташа бағасы 2.1 млн төгрөг, орта деңгейдегі тұрғын үй 2.6 млн төгрөг, бизнес санаттағы тұрғын үй 4,2 млн төгрөг, сәнді тұрғын үйлердің орташа бағасының шаршы метрі 5.5 млн төгрөгке дейін жетеді. Орналасқан өңірі, құрылыс сапасы, сыртқы безендіруіне байланысты жаңа тұрғын үйлердің бағасы әр-түрлі.

-Жұқпалы індеттің әсеріне байланысты құрылыс компанияларына қандай мәселелер кездесуде? Сонымен қатар, құрылыс компанияларын қолдау бағытында қандай жұмыстар атқарудасыздар?

-Жұқпалы індет Моңғол еліне ғана емес дүниежүзіне әр түрлі әсерін тигізуде. Елімізде құрылыс материалдарының бағасы 10-90% өсті, жұмысшылар азайды, компаниялардың айналым қаражаты таусылды, құрылыс материалдарының тапшылығы, шекара, кеден мәселелері, транспорттың бағасы қосылғаны сынды көптеген мәселелер кездесіп жатыр. Моңғол елі Үкіметінің іске асырып жатқан Экономиканы құтқару 10 трлн төгрөг кешендік жоспар аясында 3 трлн төгрөгтік қаржыландыру құрылыс саласын қолдауға жұмсалуда. Бұл тұрғыда құрылыс компанияларының сатылымын қолдау мақсатында ипотекалық несиенің пайыздық мөлшерлемесі 6 пайызға дейін төмендетіліп, ипотекалық қаржыландыру көлемі ұлғайтылды. Қазіргі уақытта сатылған барлық пәтерлердің 70% ипотекалық несие арқылы сатылған. Жаңа тұрғын үйлердің зерттеуін жасаудағы тағы бір мақсатымыз жылында қанша қаржы ипотекалық несиеге қажет екендігі, жылында қанша тұрғын үй жаңадан пайдаға беріліп жатқандығы, және ол үйлердің қаншасы ипотекалық несие арқылы сатылып жатқандығын зерттеу болып табылады.

-Тұрғын үйлердің салынуы мен сыртқы безендірулері туралы зерттеу жасалды ма?

-Құрылыстың қасбеті (фасад), сыртқы безендіруі бойынша зерттеулер де жасалды. Пайдаға берілген барлық жобаның 55% толығымен бетоннан жасалған, 40% темірбетон қаңқасымен құрастырылып жасалған болса қалған 4% кірпішпен қаланып салынған.

Қасбетке келетін болсақ, 54% полистирол көбік фасад, 25% темір метал, 10% тас, 3% әйнекті фасадпен салынған. Жобалардың 93% сыртқы алаңына мүмкіндігі шектеулі адамдарға арналған жол салған.

Құрылыс туралы заңда барлық алаңның 30 пайызына сыртқы безендіру жұмыстары жасалады деп көрстеліген. Олай болса зерттеуге қамтылған барлық жобаның 91 пайызы 30 пайызға дейінгі алаңына безендіру жасаған болса, 30 пайыздан көп алаңға безендіру, көгалдандыру жасап, қауіпсіздікті қамтамасыз еткен тұрғын үй қалашықтары барлық жобаның 9 пайызын ғана құрайды.

Қорыта айтар болсам, соңғы жылдары құрылыс саласы озық технологияларды енгізіп, әлемдік стандарттарға сай келетін сапалы ғимараттар мен тұрғын үйлер салып қарқынды дамып келе жатқаны мақтауға тұрарлық.

Continue Reading

Жаңа есім

Ризабек Жазидолдаұлы: ҚарЛаг қасіреті

Published

on

31 мамыр, KAZNEWS. Қазақстан Республикасының тәуелсіздігінің 30 жылдығына арналған «Тәуелсіздік: Сөз бен Сурет» атты ақындар мен суретшілер арасында өтетін онлайн-байқауға суретші Ризабек Жазидолдаұлы қатысып жатыр.

Ризабек Жазидолдаұлы @rizabek.jazidolda, суретші, 1979 жылы Баян-Өлгий аймағында дүниеге келген. Көптеген халықаралық көрмелерге қатысқан.


Суретші туындысын «ҚарЛаг қасіреті» деп атаған. Суретті сызу үшін тарихты зерттеп көрген. ҚарЛаг тарихы жетпіс жыл билік құрған кеңестік биліктің зор­лықшыл саясатының қасіретті куәсі және қуғын-сүргін саясаты жүрілген кезде олардың арасында балалар да жапа шеккенін көруге болатынын айтады.

ҚарЛаг қасіреті

Қабырғадағы күннің жарығы түбінде бір қазаққа жарық күннің нұры келеді дегенді білдіреді. Әппақ көгершіндер осында болған адамдарды еске алуға келгендерді, қуыршақтар қамауда балалардың болғанын, олардың «бізді де ала кет» деп тұрғанын байқауға болады. Қағаздан жасалған құстар қамауда болған адамдарды бейнелейді. Ал сол құстардың көлеңкесі арқылы қамаудағы адамдардың тағдыры құс болып ұшқанын көрсеткен.

Туындыдан Сталиннің жоғарыдағы суреті қылышынан қан тамған заманындағы бейнесі мен жерге қарай құлап жатқан Ленинмен Сталиннің суретін байқауға болады. Олардың өздері де, заманы да құрдымға кеткенін көрсетуге тырысқан.

Суреттің жоғыры жағынан «Бізді ұмытпа» деп қанмен жазылған жазуды көруге болады.

Ал, орындық пен гүлдер қуғын-сүргін құрбандарының құрметіне арналады.

Continue Reading

Басты назарда